Igrexas

Santalla de Bóveda de Mera (Lugo)_ sábado 5 de setembro 2015

 

SANTA EULALIA DE BÓVEDA
COMO CHEGAR: Parroquia de Santalla de Bóveda de Mera, no concello de Lugo (Lugo). Ao saír de Lugo cidade pola estrada vella a Santiago de Compostela (LU-232), antes de chegar a Friol cómpre desviarse á dereita e seguir a sinalización do templo polas estradas LU-P-2901 e LU-P-2903. Tamén se pode ir polo Camiño Primitivo desde Palas de Rei.

Á DESCUBERTA DO PATRIMONIO. As peculiares características deste templo tardo-romano, que chegou a ter usos cristiáns baixo a advocación de Santa Eulalia, suscitaron desde o seu descubrimento múltiples interpretacións sobre a súa finalidade orixinal: lugar de baños, ninfeo, templo dedicado a Prisciliano…
Neste edificio de planta rectangular destaca a ornamentación da bóveda de canón na que aparecen representados diferentes tipos de aves pintadas entre motivos vexetais. Tamén sobresaeo seu arco de ferradura, considerado como o máis antigo que existe na arquitectura española como elemento estrutural. As impresionantespinturas, as súas especiais características e todas as controversias respecto da súa orixe fan deste monumento prerrománico un dos máis senlleiros do occidente europeo.

18.00 MONUMENTA DIVULGA. Visita ao monumento de Santalla de Bóveda de Mera da man da especialista en arqueoloxía da arquitectura Rebeca Blanco.
18.30 ANDAR CON ARTE. Andaina circular pasando polo castro de Corvazal. Durante o paseo, o xeógrafo Juan López Bedoya analizará esta paisaxe agraria para achegarnos á flora e á fauna características da zona.
19.30 FALADOIRO MONUMENTA. O arquitecto Antonio de Vega falaranos da relación entre a paisaxe e a característica arquitectura popular de Santalla.
20.00 MONUMENTA EN CONCERTO. Rodrigo Romaní en formato trío nos exteriores da igrexa de Santalla de Bóveda de Mera.

Rodrigo Romaní
RODRIGO-ROMANI
Rodrigo Romaní é un dos músicos máis destacados do panorama musical galego. Membro fundador de Milladoiro, abandonou o mítico grupo de folk para embarcarse en diversos proxectos, algúns tan significativos como a posta en marcha de Sondeseu, a primeira orquestra de folk de Galicia e de Europa. Embaixador da música tradicional galega, Rodrigo Romaní leva 30 anos paseando a súa arpa por medio mundo, primeiro con Milladoiro e, desde hai uns anos, co seu nome, acompañado doutros músicos convidados.

Igrexas

Aquis Querquennis (Bande)_domingo 30 de agosto 2015

 AQUIS QUERQUENNIS - BANDE
COMO CHEGAR: Parroquia dos Baños (San Xoán), Os Baños, Bande (Ourense).En pasando Celanova, dirección Bande, continúase cara a Portugal pola OU-540 e, a 7.5 km de Bande, cómpre virar á esquerda e seguir a sinalización do xacemento.

Á DESCUBERTA DO PATRIMONIO. Situado a carón da vila de Bande, está considerado como un dos principais xacementos arqueolóxicos da comarca. Cronoloxicamente dátase entre os séculos I e II d.C. O conxunto atópase localizado preto da vía romana denominada Vía XVIII, calzada que unía Astorga e Braga.
Coñecido como A Cidá (a cidade), este campamento militar de forma rectangular, no que destacan as súas murallas, controlaba o río Limia e os arredores. Aquí permanecía unha guarnición romana de infantería e cabalería que dominaba a poboación oriúnda. Aínda conserva a súa rampla de acceso, as torres cadradas e un foso. Tamén se poden ver os piares nos que asentaban os almacéns.
É posible que este lugar tivese naquela altura un hospital, dados os restos encontrados e a existencia de mananciais de augas termais. Coñecedores das propiedades curativas que brotan nas inmediacións do campamento, os romanos aproveitáronse sempre deste recurso natural.

18.00 MONUMENTA DIVULGA. Visita ao centro de interpretación da Fundación Aquae Querquennae Via Nova.
18.30 ANDAR CON ARTE. Andaina narrada por Antonio Rodríguez Colmenero (Catedrático emérito de historia antigua da Universidade de Santiago de Compostela) e Manuel Rivero Pérez (antropólogo e sociólogo) ata o campamento militar, con visita ao xacemento arqueolóxico e ás termas.
20:00 MONUMENTA EN CONCERTO
Odaiko en concerto nos exteriores do centro de interpretación da Fundación AquaeQuerquennaeVia Nova.

ODAIKO
ODAIKO
Este grupo integrado por licenciados en percusión formouse en Holanda no ano 2003. A súa proposta artística céntrase na exploración da música tradicional, pero na súa variante percutiva, faceta pouco traballada pola dificultade que supón a diversidade técnico-musical. Teñen participado en grandes festivais internacionais de Holanda, Estados Unidos de América, México, Taiwán, Filipinas etc. Realizaron gravacións con diferentes artistas e formacións como Budiño, Nova Galega de Danza, a Orquestra Nacional de Irlanda ou a Orquestra Sinfónica de Galicia. Na actualidade, Odaiko é un dos grupos máis solicitados pola súa facilidade para enganchar públicos de todas as idades.

Igrexas

O gótico mariñeiro de Noia_ sábado 29 de agosto 2015

IGREXA DE NOIA

COMO CHEGAR: Noia (A Coruña). Desde Santiago de Compostela, autovía AG-56 e comarcal AC-550.
Á DESCUBERTA DO PATRIMONIO. Noia conta cunha fermosa zona histórica froito do apoxeo medieval e das actividades mercantís e pesqueiras da vila. Nela destacan dúas xoias de estilo gótico mariñeiro, a igrexa de Santa María a Nova, que acolle a mellor colección de lápidas gremiais e nobiliarias da Idade Media e Moderna, e a igrexa de San Martiño de Noia, cunha espectacular fachada de grandes figuras escultóricas. A vila histórica conserva, ademais, diferentes casas con brasón, corredores e galerías. Bo exemplo disto son o pazo Dacosta, o pazo da Rúa do Forno do Rato, a casa da Xouba, a casa do Rosa ou a casa do Senra, xa de estilo barroco.
19.30 MONUMENTA DIVULGA. Acompañados pola arqueóloga municipal Ana Filgueira, visitaremos a igrexa de Santa María a Nova, o museo de laudas gremiais e o seu cemiterio, para facer voar a imaxinación e evocar tempos pretéritos.
20.30 FALADOIRO MONUMENTA. O xornalista e músico Xurxo Souto realizará unha fermosa “barriografía” de Noia en conversa con diferentes veciñas e veciños protagonistas da actualidade cultural e social de Noia.
21.30 MONUMENTA EN CONCERTO. Talabarte Trío rematará a xornada cun concerto moi especial na praza do Tapal.

Talabarte Trío

TALABARTE
Son tres músicos procedentes de bandas como Berrogüetto, Marful e Susana Seivane. O violín de QuimFarinha, o acordeón diatónico de Pedro Pascual e o contrabaixo de Kin García son xa indispensables dentro da escena musical galega. Xuntos propoñen unha viaxe a través das músicas populares de Galicia e doutras latitudes. Talabarte deulle unha nova dimensión á música galega, partindo da bagaxe musical dos seus integrantes, cunha proposta que atravesa fronteiras, pasando polos sons do leste europeo e o Mediterráneo.Contemporaneidade e tradición nun concerto diferente, para alegrar os pés, as ideas e o resto dos sentidos.

Igrexas

Xacemento Arqueolóxico de Tourón (Pontecaldelas)_xoves 27 de agosto 2015

TOURÓN

COMO CHEGAR: Tourón, Ponte Caldelas (Pontevedra). Desde Ponte Caldelas, cómpre tomar a estrada autonómica PO-532, dirección Pontevedra, e seguir a sinalización cara ao centro arqueolóxico.

Á DESCUBERTA DO PATRIMONIO. A área arqueolóxica de Tourón é un dos complexos de arte rupestre ao aire libre máis singulares de Galicia. Con máis de 15 hectáreas de extensión, ofrece a posibilidade de visitar cinco estacións rupestres onde se poden ver petróglifos e gravados sobre rocha que datan do Neolítico final – Idade de Bronce. Durante a ruta, repararemos noutros elementos culturais situados ao longo do camiño; e desde os dous miradoiros poderemos observar a paisaxe circundante.

20.00 MONUMENTA DIVULGA. Visita ao centro de interpretación.
20.30 FALADOIRO MONUMENTA. O comisario de arte contemporánea Ángel Cerviño e o artista sonoro Carlos Suárez falarannos da relación entre natureza e arte no século XXI.
21.00 MONUMENTA EN CONCERTO. Leilía en concerto no pavillón do CEIP Manuel Cordo Boullosa. Cambio de ubicación por causas climatolóxicas
22.00 ANDAR CON ARTE. Entre lusco e fusco, visita guiada polo arqueólogo Santiago Vázquez Collazo á area arqueolóxica e visionado nocturno dos petróglifos. Ademais, Pablo Martínez Alemparte, arqueólogo e especialista en astronomía, guiaranos polo firmamento e axudaranos a establecer conexións co xacemento.

Leilía

LEILÍA
O grupo nace en 1989 da man de seis mulleres co propósito de recuperar do esquecemento a música de tradición oral de Galicia. Daquela, foi unha aposta pioneira e atrevida, que axiña tivo a súa recompensa internacional grazas á súa beleza e singularidade. Na actualidade, Leilía é un referente tanto para os que queren achegarse á música orixinal de Galicia como para os que buscan a fusión da tradición con sons e instrumentos contemporáneos. Máis de 25 anossobre os escenarios, cinco discos publicados, unha chea de colaboracións con artistas e grupos como KepaJunquera, Milladoiro, Emilio Cao, Os Diplomáticos de Monte Alto ou Budiño, e ducias de concertos por todo o mundo.

Igrexas

Petróglifos de Mogor.Marín (Pontevedra)_sábado 05 de xullo

O conxunto de Mogor, datado na Idade de Bronce, entre o 1800 e o 600 a.C., é un dos máis destacados de Galicia polos seus gravados labirínticos. As rochas máis estudadas son a pedra dos Mouros, con combinacións circulares e cazoletas, e a pedra do Labirinto. Ainda así, desentrañar o simbolismo dos petróglifos é unha cuestión complexa que ofrece diversas interpretacións por parte dos especialistas. Monumenta convídanos a facer unha descuberta orixinal e diferente entre lusco e fusco.

19.00 MONUMENTA EDUCA. Presentación dos traballos realizados polo alumnado do CEIP Carballal no exterior do centro de interpretación de Mogor.

19.00 ANDAR CON ARTE. Mogor, entre a serra e o mar do Morrazo. Saída –e chegada– desde o centro de interpretación. Este itinerario de percepción paisaxística vai ser un paseo guiado polo xeógrafo Juan López Bedoya. Percorreremos a pé a zona, desde a serra ao mar, atravesando por Mogor e o seu xacemento arqueolóxico, para enxergar a evolución da paisaxe física e sonora do Morrazo desde a época dos petróglifos.

22.00 MONUMENTA EN CONCERTO. Coa participación de Carlos Rilo, Xosé Lois Romero, Carlos Taboada, José Ramón Bugliot e Daniel Romero, o Grupo de Música Tradicional de Agadic, introducirémonos entre sons naturais nas melodías tradicionais de Galicia.

 22.30 MONUMENTA DE NOITE. Monumenta ofrécenos a posibilidade de descubrir os petróglifos, coas explicacións expertas do arqueólogo Santiago Vázquez Collazo.

2013, Igrexas

Catedral de Tui (Pontevedra) 9 de novembro

A catedral de Santa María, que destaca polo seu aspecto de fortaleza, é o edificio máis representativo do patrimonio artístico da vila de Tui. Consagrada en 1225, a súa construción iníciase no século XII, en pleno románico, como se ve na planta, na portada norte e na iconografía dos capiteis. A fachada principal gótica é unha das primeiras obras deste estilo realizada na Península Ibérica.

17:00 Obradoiros para familias Conservamos e restauramos: pintura, retablos e cubertas

18:00 Concerto acústico de Rosa Cedrón

A actividade lúdica e de aprendizaxe para coñecer como son os procesos de restauración dos bens patrimoniais complétase en Tui coa intervención artística de Rosa Cedrón, a voz que gravou innumerables cancións no corazón dos galegos, tanto en solitario como na anterior etapa con Luar na Lubre. A súa versatilidade, a frescura e a súa expresividade foron as mellores armas para converterse nunha das cantantes galegas de maior proxección. Compatibilizando a gravación do seu segundo álbum en solitario, desenvolve numerosas colaboracións con Mike Oldfield e participa en proxectos paralelos como o “Cantando a Galicia” ou o iniciado con Cristina Pato, “Soas”. Colaboradora habitual do programa “Luar” da TVG, desenvolve na súa última etapa un espazo onde repasa os grandes temas da nosa historia musical.

2013, Igrexas

Santuario da Angustia. Betanzos (A Coruña) 10 de novembro

O Santuario da Angustia, de estilo barroco do século XVIII (1750), está situado na parroquia de San Pedro das Viñas. A recente renovación dos revestimentos interiores do templo contribúe á conservación deste interesante exemplo do barroco galego, no que se mestura a sobriedade estrutural e un profuso xogo de elementos xeométricos. No retablo principal, a imaxe procesional da Virxe da Angustia.

12:00 Obradoiros infantís sobre arquitectura e restauración no Liceo de Betanzos

16:30 Paseo sonoro coa participación dos gaiteiros “Pepe Temprano e os seus Mariachis” e Alfredo Erias, historiador e narrador do paseo. (Saída desde a Estación Betanzos-Infesta ata o Santuario)

Para completar a xornada iniciada de mañá cun obradoiro dirixido á xente miúda sobre arquitectura e restauración, pola tarde Monumenta convida a un paseo sonoro local e singular.  O gaiteiro Pepe Temprano é a segunda xeración dos Tempranos de Eirís (o primeiro cuarteto de gaitas que houbo nas Mariñas e historia viva da gaita en Galicia). Desenvolveu toda a súa vida laboral na Fábrica de Tabacos da Coruña desde onde as súas Cigarreiras ían en romaría ata a Igrexa das Angustias.

A palabra fíaa nesta andaina Alfredo Erias,  historiador, pintor, debuxante e gravador, e director do Museo das Mariñas, en Betanzos.

18:00 Concerto na igrexa: Pedro Lamas e Xosé Lois Romero

Para pechar a xornada, as portas da igrexa ábrense a dous dos músicos de referencia nas propostas máis actuais da música galega. Pedro Lamas é saxofonista, gaiteiro, arranxista e compositor. É un músico formado na tradición, con numerosos galardóns neste campo. É fundador de prestixiosos grupos como Lelia Doura ou Luvas Verdes,  e colaborador doutros como Uxía Senlle, Guadi Galego, Susana Seivane, Nova Galega de Danza etc. Xosé Lois Romero foi formado desde neno na música popular galega, exerceu de percusionista en numerosas formacións tradicionais e, desde 1995, é membro do Grupo Tradicional da AGADIC, dependente da Xunta de Galicia, onde realiza traballos de interpretación, investigación, docencia e publicación de material audiovisual sobre patrimonio musical galego. Forma parte, con Guadi Galego e Xabier Díaz, do grupo Acadacanto.

2013, Igrexas

Igrexa de San Miguel de Osmo. Cenlle (Ourense) 16 de novembro

A igrexa de San Miguel de Osmo é un edificio de núcleo románico fortemente transformado nos séculos XVI e XVII, incluído dentro do dominio do mosteiro cisterciense de San Clodio. Os traballos de restauración realizados na sancristía sacaron á luz dous fragmentos de pintura mural nos que se atopou un texto litúrxico en latín.

16:30 Obradoiros para familias sobre restauración de pinturas e Faladoiro cos veciños e veciñas nos que se recollerán, en conversa informal, as lembranzas vinculadas ao lugar

17:30 Concerto da Rondalla Alfaia de Cenlle

A actividade en Cenlle comeza pola tarde, nun espazo de encontro para aprender, compartir e falar. Tamén para recuperar a memoria e que os máis novos a coñezan. E a media tarde, comeza a festa. A Asociación Cultural Alfaia naceu no ano 2002 froito das inquietudes musicais dun grupo de afeccionados á música. Na actualidade o grupo está formado por doce membros (tres bandurras, catro laúdes e cinco guitarras) dirixidos por D. Francisco Villalonga Baños, un profesional da música con máis de corenta anos de experiencia na ensinanza dos instrumentos de pulso e púa.

O repertorio da formación é moi variada e abrangue melodías populares, clásicos intemporais da música e cancións de tuna, mostrando que o grupo non é unha rondalla ao uso, senón unha formación de carácter ecléctico.

2013, Igrexas

Igrexa de Santa María de Nogueira de Miño. Chantada (Lugo) 17 de novembro

Construída entre os séculos XII e XIII, nesta igrexa románica de Nogueira de Miño destacan as pinturas murais de influencia italiana de mediados do século XVI, realizadas ao fresco. Coa actual intervención de recuperación, o Xuízo Final que decora o muro norte do templo desvélase como un dos máis importantes ciclos pictóricos da Idade Moderna galega, que destaca especialmente pola súa orixinalidade e integridade iconográfica, así como pola súa alta calidade estilística.

16:30 Obradoiros para familias sobre restauración de pinturas e Faladoiro cos veciños e veciñas nos que se recolleran, en conversa informal, as lembranzas vinculadas ao lugar

17:30 Concerto da Coral Polifónica de Chantada

Entrevista e diálogos coa coral a cargo de Xurxo Souto

A programación de Monumenta en Santa María de Miño convida a achegarse a primeira hora da tarde ao labor de recuperación das pinturas desta igrexa de Chantada. O encontro permitirá tamén compartir a memoria das vivencias vinculadas a este lugar.

Unha hora despois, a música vén da man da Coral Polifónica de Chantada. Esta agrupación musical foi fundada en xullo de 1964 polos veciños de Chantada xunto co  párroco Modesto Fernández Rodríguez, que foi director da Coral ata 1992. Na actualidade conta con 34 compoñentes que traballan baixo a dirección de Marcos Fernández Varela, veciño da localidade.

Ao remate da actuación, Xurxo Souto, cantante, acordeonista, escritor, locutor e licenciado en filoloxía clásica, establecerá un diálogo cos integrantes da coral que permitirá afondar no traballo desta.