PONTEDEUME, A CORUÑA
Venres 6 de agosto, 10:00 h

PUNTO DE ENCONTRO
Xardíns de Lombardero. Como chegar: entrar en Pontedeume pola N-651. Recomendamos estacionar fronte ao Instituto de Educación Secundaria Fragas do Eume.

Á DESCUBERTA DO PATRIMONIO
Pontedeume fúndase como poboación ex novo en 1270 xunto a unha ponte, paso obrigado nas comunicacións terrestres norte-sur, co obxecto de completar a organización do territorio dos arciprestados de Pruzos e Bezoucos. O seu emprazamento, con limitacións de espazo na costa e de calado do porto, hipoteca o seu futuro, converténdose co paso dos séculos nun centro comarcal de servizos.

MONUMENTA DIVULGA
A principios do século XIX, a cidade portuaria da Coruña era un enclave estratéxico no comercio europeo e transatlántico. A súa elite comercial e financeira, do mesmo xeito ca a do resto do mundo occidental, utilizou a música de cámara clásica vinda de Londres e París como símbolo de distinción social e exhibición de poder.

MONUMENTA ESCOITA
Antía Muíño, afincada en Donostia, é unha das voces máis suxestivas da nova canción galega. Aínda estamos pendentes do seu agardado primeiro disco, pero xa coñecemos varios adiantos onde, sen abandonar as raíces do folk, a artista nos deixa argumentos suficientes que auguran un futuro prometedor.

MONUMENTA CIRCULAR
Cátedra é unha revista eumesa que desde 1994 publica artigos de investigación dedicados á antropoloxía, o pensamento, a arte e a historia da comarca do Eume.

CAMIÑANTES CONVIDADOS
Carolina Queipo Gutiérrez, catedrática de Etnomusicoloxía do Conservatorio Superior de Música de Navarra, especialidade de Musicoloxía.
Carlos de Castro Álvarez, historiador e escritor residente en Pontedeume. É cofundador da revista Cátedra e forma parte do consello asesor e científico da revista Estudios Mindonienses.