DATOS

Día: domingo 12 de agosto
Hora de saída:
11:00 h
Hora de regreso estimada: 14:30 h
Distancia: 5,3 km
Dificultade: baixa
Observacións: a maior parte do traxecto discorrerá por áreas dunares, plataformas rochosas e cantís de distinta altura. O percorrido non require esforzos notables, pero merece precaucións tanto pola perigosidade intrínseca das propias vertentes rochosas como polo potencial dano ao fráxil ecosistema atravesado. Por iso, será imprescindible respectar o tránsito polas sendas elixidas.

Normas específicas:
http://monumentagalicia.com/normas-especificas-para-andainas. 

COMO CHEGAR: desde Ferrol, séguese a AC-116 en dirección Cedeira ata o km 9 e, a continuación, débese coller un desvío á esquerda cara ás proximidades do faro de Meirás. Uns 100 metros despois do campo de fútbol do Meirás, cómpre xirar á esquerda para estacionar na explanada da praia dos Botes.

Ligazónhttps://goo.gl/maps/1vriVck7Y182

Máis: info@sinsalaudio.org e no teléfono 619 637 211

Á DESCUBERTA DO PATRIMONIO
Ángeles Alvariño (1916-2005), serantega e ferrolá, loitou contra as dificultades de ser científica e muller para converterse nunha das oceanógrafas máis brillantes do país e acadar, desde a súa diáspora norteamericana, unha repercusión internacional sen precedentes. Na súa prolífica investigación, que comezou en España e proseguiu en Gran Bretaña e Estados Unidos, destacou o estudo do zooplancto e a súa importancia como indicador nos ecosistemas mariños e os caracteres oceanográficos asociados.

MONUMENTA DIVULGA
A interpretación dos océanos desde a costa serviranos para bosquexar a vida e a obra da oceanógrafa máis importante que deu Galicia. Malia que Ángeles Alvariño desenvolveu a súa investigación no océano, nesta viaxe interpretaremos o medio mariño desde o continente centrándonos na interacción e na súa importancia nas nosas vidas. A biodiversidade, a relación entre a atmosfera, o océano e as nosas actividades diarias, o patrimonio material e inmaterial derivado e a explicación da formación da orixinal paisaxe deste sector da costa galega acompañarán as notas que, sobre a vida e a obra de Ángeles Vilariño, permitirán entender o valor do seu labor científico e o seu afán de superación persoal.

MONUMENTA ESCOITA
Ariel Ninas e Anxo Faraldo comezan a traballar xuntos en 2010 nunha relación na que a sonoridade acústica e a evocación da tradición se mesturan coa electrónica máis cirúrxica e minimalista, sen comprometer as súas identidades orixinais. Para este evento, baixo o faro de Valdoviño, preparan unha peza a medio camiño entre instalación e concerto, para o que aproveitan a peculiaridade da sonoridade e a memoria deste lugar.

  • Prazas limitadas a 75 persoas. Admisión por orde de inscrición.

 

  • AS PRAZAS PARA ESTA ANDAINA XA ESTÁN CUBERTAS. MOITAS GRAZAS